الدافري: غادي نتكلم هنا مع نفسي…

 

كتبها: أحمد الدافري

غادي نتكلم هنا مع نفسي.

ما غانتكلمش مع الجماعة المسماة العدل والإحسان التي تتحين فرصة قيام القومة، ولا مع اليساريين ديال عصر ستالين وتروتسكي غداة ظهور الشيوعية، ولا مع أولئك الذين ينتظرون مجيء الإمام المهدي المنتظر كي يمنح حكم العالم للشيعة.

لدينا فيديو قصيييييير جدا. لا تتجاوز مدته ست ثوانٍ.

الفيديو فيه شبان جالسين فالأرض.
شي داخل فشي.
وحداهم جوج سطافيطات مكتوبة فبهم : القوات المساعدة.

حتى حد من المجموعة ما عاطي وجهو للكاميرا.
يعني واخا تبغي تعرف شكون هو ما تقدرش.

كلهم عندهم نفس السن.
وكلهم عندهم نفس طريقة الحلاقة.
الشعر رازي من الجناب..

من بعد، كينتقل الفيديو بسرعة من وضع التصوير المتحرك إلى وضع الصورة الثابثة بطريقة cut.

الصورة الثابتة فالفيديو كتبان فيها مجموعة من الشباب عاطيين وجوههم للحيط.
وكاين علامات ديال الضرب فظهر كل واحد فيهم..
زعما واكلين العصا بشي مسويطة.

المطلوب مني نمنع نفسي نقول بأن هاذ المجموعة للي عاطية وجهها للحيط فيها نفس الأشخاص للي جالسين حدا الطونوبيلات ديال القوات المساعدة.

خصني نشوف وما نطرح حتى سؤال.

شنو هي العلامة الدالة على أن هاذ الشي وقع فالمغرب وأنه تصور فالمغرب؟

العلامة هي جوج سطافيطات ديال القوات المساعدة.

واش كاينة شي علامة أخرى كتدل أن الفيديو تصور فالفنيدق؟
لا.

واخا أسيدي.

إيلا كانوا هاذ الشباب دابا معتقلين، واش حتى حد من عائلتهم ما تعرف على شي حد فيهم وناض كتب فشبكات التواصل الاجتماعي بأن ولدو أو خوه أو ولد عمو، راه مقبوط؟

واش حتى حد من عائلات هاذ الأشخاص ما ناض كيحيح ملي شاف هاذ الفيديو وقال واك واك أعباد الله راه هاذاك هو فلان ولد عائلتي؟

وإيلا كانوا هاذ الشباب مطلوقين دابا، واش حتى واحد فيهم ما عندو صفحة هنا فالفيسبوك وينوض يهضر ويتكلم ويقول إيه هاذ الشي صحيح وراه أنا واحد من هاذو للي شدوهم المخازنية وحطوهم بحال الغنم فالزنقة وسلخوهم سليخ؟

ياك كاينين فيديوهات كيدورو هنا ديال ناس كيعاودو بافتخار أنهم باغيين يحركو، ومنهم جزائريين شباب دخلو للمغرب فالطائرة من تونس.
علاش حتى حد من هاذو للي فالفيديو ما تكلم لحد الآن وقال إيه بالصح شدونا المخازنية فالفنيدق واحنا لابسين غير السليبات، وتكرفصوا علينا وطلقونا؟

واش دابا إيلا كانت صطافيط مكتوب فيها عبارة القوات المساعدة صافي، راه الفيديو تصور عندنا، وراه بالفعل هاذيك صطافيط ديال القوات المساعدة حقيقة، ما كاين لا فبركة ولا ديكور ولا أي تلاعب فالصورة؟

حاجة أخرى.

ملي كتجيب قنوات كرغولية أشخاص في مشاهد دحدوحية، وكتبقى تصور فيهم على أساس أنهم عصابات تهريب مغاربة، عندهم طوموبيلات بأرقام مغربية، وكتصور الجوندارم الكراغلة كيجريو عليهم وكيشدوهم فالحدود المغربية، وكتعطي للكراغلة يستهلكو هاذوك الروبورتاجات على أساس أنها وقائع حقيقية، واش أنا ضروري خصني نثيق بهاذ الأفلام الرديئة؟

ثم، نهار الانتخابات على تبون، ملي موقع كرغولي مشى فالصباح بكري صور واحد المدرسة للي كان فيها التصويت، واقفين عشرات من الشبان فبابها على النبوري، كلهم عندهم فورمة وحدة، وحلاقة رأس عسكرية وحدة، وأعمارهم تقريبا وحدة، وكيف تفتح الباب مشاو كلهم كيجريو، شي كيدفع شي، باش يوصلو لمكاتب التصويت، واش أنا ولا غيري من الضروري نثيق بأن هاذ المسرحية هي واقعة حقيقية، واخا الجزائريين بنفسهم ما ثاقوش بيها، وعرفوا بأن هاذوك كلهم كانوا عسكر شباب، شاركوا فذيك المسرحية؟

دابا مثلا واش للي موالف فالتلفزيون ديالو كيمشي يصور أن البوليساريو كيصيفط القنابل والصواريخ على الصحراء المغربية، ما يقدرش زعما يصور مسرحية رديئة، ويحطها الذباب الاستخباراتي هنا أو فأي موقع من مواقع التواصل الاجتماعي، باش يحقق انتصار وهمي على الدولة المغربية، أمام الإخفاقات للي كيتعرض ليها من المغرب في جميع المحافل الدولية؟

آه. لا. ما يمكنش هاذ الشي يكون..
حيت احنا الدولة ديالنا خايبة، فيها المخازنية كيدخلو للبحر، وكيشدو الحراكة، وكيخرجوهم من البحر لابسين السليبات، وكيبقاو يعطيهم فالعصا للظهر، وكيعيطو على مصور، وكيقولوا ليه صور لينا عافاك هاذ الماعز، وحط تصاورهم فمواقع التواصل الاجتماعي.

ياك؟
هاكا القضية؟

حطيت هنا قبل قليل فيديو فيه صياد هاز حوتة عندها راس ديال معزة، لقاها كانت غاديا حاركًة لسبتة، وبقات كتغوث عليه : ممهوووووووو 😀.
وهذا ما كان.