علاش الحكومة خايفة من لجنة تقصي الحقائق؟ وشكون اللي قصى رزق البلاد والعباد؟
شرح ملح:
علاش الحكومة خايفة من لجنة تقصي الحقائق؟ وشكون اللي قصى رزق البلاد والعباد؟
بقلم : عبدالهادي بريويك
المعارضة فالبرلمان ما سكتاتش، وخرجات ببلاغ فيه حوالي 206 كلمة، كيطالبو فيه بتشكيل لجنة تحقيق باش يفتحو عينيهم وعينينا على الدعم اللي كتوزعو الحكومة لاستيراد الماشية ولمساعدة الكسابة.
حيت كاين بزاف ديال الهضرة على صفقات فيها ريحة ماشي هي هاديك، وصفقات خسرات على الدولة الملايير، واللي ممكن توصل حتى للعدالة.
لكن شكون ناض؟ الأغلبية! وجاو بطلب صغير وصافي، فيه غير 54 كلمة، موجّهين لرئيس لجنة القطاعات الإنتاجية (اللي راه من نفس الفريق اللي مع الحكومة).
الهدف؟ بسيط: يضربو هاد المبادرة فالصّفر، ويغطيو الشمس بالغربال، باش ما يتفضحش “المستور”.
الفرق واضح بحال فرق النهار والليل: المعارضة كتقلب على الحقيقة وكتسول على فلوس الشعب اللي طارو، وباغية تحقق مع الناس اللي دايرين راسهم مافراسهومش. والأغلبية؟ جابت لجنة “استطلاعية” بلا أنياب، بلا صلاحيات، غير باش يبانو خدامين، ولكن فالحقيقة باغيين يطمسو الحقيقة، ويحاولو يدارو الغبرة على عينيك باش ما تشوف والو.
فين غادين بينا؟ واش غنخليو فلوسنا تكمش فجيوب اللي ما كيحشموش؟ راه الشعب عاق وفاق، وما بقى عندو صبر بزاف!