فضيحة بقلالشها….

تدوينة كتبها: احمد الدافري

فضيحة بقلالشها 🤒.
الرئيس عبد المجيد التبون كان جالس مريح مع راسو بينو وبين كاتب الدولة في الخارجية الأمريكية أنطوني بلينكن مللي زار هذا الأخير الجزائر قبل أربعة أيام، وكان التبون واخذ راحتو معاه فالهضرة، وخدام كيشكي ليه بالمغرب وكيحرضو زعما علينا وكيقول ليه المغرب راه بلد توسعي كان بغى ياخذ أراضي ديال الجزائر عام 1963 وهجم عليها بالطياير والإيليكوبتيرات وقتل ليها 850 واحد.. وزاد طلق عليه واحد السلوكًية كبيرة مللي بغى يبين ليه بللي الجزائر زعما ما عندهاش أطماع فالوصول للمحيط الأطلسي بخلق دولة تحت السيطرة ديالها فالصحراء المغربية، وأنها فقط كتدافع على استقلال الشعوب، وبأنها عندها أعظم دبلوماسية فالعالم، وهي للي قنعت أندونيسيا تعطي الاستقلال لتيمور الشرقية، و هي للي طيحت الأبارتايد من جنوب إفريقيا وزولت منها نظام الميز العنصري، وهي للي جابت الاستقلال لجزر القمر. 😃😃😃..
كان كيعاود ليه هاذ الخرايف زعما وهو مرتاح وفرحان.. وإذا به كيلقى من بعد ثلاثة أيام كًاع الهراء والسخافة والكذوب للي كان طالقهم على السيد، تسربو بالصوت ديالو المتمسكن، وسمعهم العالم كلو..
كيفاش محادثات ديال لقاء رسمي ما بين رئيس دولة ووزير خارجية دولة عظمى من المفروض تبقى سرية وما يخرج منها إلا ما هو متفق عليه ما بين الطرفين في شكل بلاغ مشترك أو ندوة صحفية مشتركة، تتسرب من داخل لقاء ثنائي رسمي حول أمور خصها تبقى سرية؟..
بطبيعة الحال بعض وسائل الإعلام التابعة لنظام الرئيس التبون والشنقريحة تتهم المخابرات المغربية بتسريب هاذ الحديث/ الفضيحة….
واخا….دابا إذا افترضنا بللي بالفعل المخابرات المغربية هي للي دارت هاذ الفعلة.. راه هذا يعني أن الرئيس التبون ما محميش، وأي حاجة سرية قالها راها مفضوحة، وأن المخابرات ديال النظام ديالو شادة الركنة وناعسة كتشخر، وأن المخابرات المغربية تقدر تعرف الشنقريحة شحال من مرة كيدخل للطواليط باش يبول..
يعني هاذي ما بقاتش دولة عندها أسرار ديالها. هاذي ولات ملحقة من ملحقات ساحة جامع الفنا ديال مراكش، للي بغى يتصنت يشد بلاصتو و آراك للفراجة. وهذا ما كان.